Қосановтың электорат арасында беделі бар ма?

none

1 қыркүйекте Қазақстанда күзде кезектен тыс президенттік сайлау өткізу ұсынылған бойда саясаткер Әміржан Қосанов оған қатысуға ниетті екенін мәлімдеді. Мұны ол әлеуметтік желідегі парақшасында хабарлады.

«Уақыт өте тығыз. Орталық сайлау комиссиясы қолайсыз адамдарды тіркемейтін шығар. Бірақ мен 2019 жылы ресми процедурадан өттім. Иә, Әбілязов, Қажыгелдин және басқа да ескі оппозициялық партиялар мені сынады, бірақ ертең биліктің тағы бір оппоненті тіркелсе, мен оларды қолдаймын», - деп жазды Қосанов.

Саясаткер егер басқалар тіркелмесе, өзінің президенттік сайлауға түсуге дайын екенін мәлімдеді, себебі ол заңдық тұрғыда тіркелуге мінсіз.

Саясаткер 2019 жылы өткен соңғы президенттік сайлаудағы дауыс берудің ресми нәтижесі бойынша 16,23% дауыс жинаған болатын. Ал қазіргі президент Қасым-Жомарт Тоқаев ресми мәлімет бойынша 70,96% дауыс жинап, жеңіске жетті.

Тәуелсіз бақылаушылар Алматының өзінде ғана Әміржан Қосановқа дауыс бергендердің саны ресми нәтижеден кемінде 20 мың адамға асып кеткенін айтып, сайлау нәтижесін заңсыз деп тануды талап етті. Бірақ журналистер алдында сөз сөйлеген кезінде Қосанов Тоқаевтың жеңісін мойындап, егер біртұтас оппозиция мен тәжірибесі мол ықпалды саяси ұйым болса, одан көбірек дауыс жинай алуы мүмкін екенін айтты.

«Мен адамдарды көшеге шығуға үндемеймін. Және мұны басынан бастап айттым. Мен заң аясында, құқық шеңберінде жұмыс істейтін саясаткермін. Радикалдарға бұл ұнамайтын шығар, басқаларға ұнамайтын шығар, бірақ маған тұрақтылық керек. Маған қазақтың тәуелсіздігі керек», - деді Қосанов 2019 жылғы 10 маусымда. Бұған қоса өзінің жақтастары сайлау комиссияларының хаттамаларын зерттеп, «барлық заңды жолдарды» пайдаланатынын мәлімдеген болатын.

Назарбаев дәуірі аяқталады деген көңіл-күйдегі сайлаушылар тәжірибелі саясаткер Әміржан Қосановқа үміт артып, оны қолдап дауыс берген еді. Бірақ бұл мәлімдемесінен кейін оның беделі күрт төмендеп кеткені көпшіліктің есінде шығар. Бұл жолы Қосанов кімге сүйенеді екен?

Айдары: Түтін 05.09.2022 42

Қатысты мазмұн