Бейнеуде теміржолшылар наразылыққа шықты

none

Маңғыстау облысы Бейнеу стансасында теміржол жөндеушілердің наразылығы 1 тамыздан бері жалғасып жатыр. Үш жүзге жуық теміржолшы жалақыны көтеруді, еңбек жағдайын жақсартуды талап етіп, әлі үйлеріне тарқамай тұр.

Теміржолшылар Бейнеу стансасындағы кеңсе аумағындағы гараждың маңына жиналып тұрғандарын айтады. Олардың сөзінше, жұмысты тоқтатпаған, жол қауіпсіздігіне жауаптылар өз кестелері бойынша теміржол рельстерінің қауіпсіздігін тексеріп келіп, наразылардың қатарына қосылып отырады.

"2 тамызда гараждың қасына киіз үй тігіп, көрпе-жастық әкеліп, қонуға бекінгенбіз. Бірақ әкімдіктегілер мен жұмыс берушілер келіп жықтырып тастады. Енді таңертеңнен кешке дейін осы жерде тұрып жүрміз. Жалақымызды Маңғыстау стансасымен теңестіріп көтеруді және жүз пайызға өсіруді талап етеміз. Талап орындалғанша кетпейміз, бұл – ұжымның шешімі", – деді 4-разрядты жол жөндеуші Жайлаубек Жанбусинов.

Жиналғандардың арасында Бейнеуден алыс орналасқан Саятөс, Үстірт, Шам, Ақжігіт разъездерінен келіп тұрғандар да бар. Бес баласы бар Жайлаубек Жанбусиновтің өзі Саятөс стансасында тұрады. Ол айлыққа 200 мың теңге алатынын, бұл айлық жетпейтінін, әйелінің жұмыссыз екенін айтады.

"Біз қатты қажыдық. Жұмысымыз ауыр. Таңғы жетіден кешкі беске дейін далада жүреміз. Екі разъез арасында бас сұғып тамақ ішіп отыруға арналған «будкалар» бар. Бірақ оның ішінде отыру мүмкін емес. Өзімізбен алып шыққан асымыз жазда ашып кетеді, қыста қатып қалады", - дейді ол.

Жанбусиновтің сөзінше, Маңғыстау стансасындағылар Бейнеуге қарағанда 50-60 мың теңге артық алады, ал атқаратын жұмыстары бірдей.

1 тамызда темір жол жөндеушілері наразылығынан соң "Қазақстан теміржолы" ұлттық компаниясы ресми сайтында олардың жалақыны жүз пайызға көтеру талаптарын қаражат жоқтығынан орындай алмайтынын мәлімдеген, деп жазады azattyq.

"Бұған дейін жалақы екі мәрте көтерілген. Қазір теміржолдың жағдайын білесіз, қарыз көп. Ертең компанияның басшыларының бірі барады деп отырмыз. Жаңалық болса хабарлаймыз", - деді "Қазақстан теміржолы" компаниясының баспасөз хатшысы Жанат Ойшыбаева.

"Қазақстан теміржолы" сайтында компанияның қазіргі борышы 1,9 триллион теңге екені жазылған. Кейінгі бес жылда компанияны дамыту үшін мемлекеттен 171 миллиард теңге бөлінген.

Айдары: Найзағай 03.08.2022 70

Қатысты мазмұн