Пандемияға байланысты сайлау мерзімі неге ауыстырылмады

none

Бүгін ҚР Орталық сайлау комиссиясының мүшесі Серік Сыдықов коронавирус пандемиясына байланысты Мәжіліс пен мәслихат сайлауын өткізу мерзімі неге ауыстырылмағанын айтты.

Оның атап өтуінше, Конституциямызда да, Заңдарымызда да карантин енгізілген кезде немесе өзге де жағдайларда сайлауды өткізбеу немесе басқа уақытта ауыстыру – көзделмеген.

«Мемлекеттік органдардың және лауазымды тұлғаның өкілеттігіне қатысты мәселе туындауы мүмкін. Өйткені, Конституция мен Заңдарда мемлекеттік органдарға сайланатын лауазымды тұлғаның өкілеттігін ұзарту қарастырылмаған. Сондықтан сайлау белгіленген уақытта өтеді», - деді Серік Сыдықов Орталық сайлау комиссиясында өткен баспасөз мәслихаты барысында.

Сонымен қатар ол жазда Сенат депутаттарын сайлау барысында санитарлық-эпидемиологиялық талаптардың қатаң сақталғанын атап өтті.

«Жазда Сенат депутаттарын сайлауды өткіздік. Шынымен де ол кезде сайлаушылар саны шектеулі болды. Соған қарамастан денсаулық сақтау органдары, аумақтық комиссиялар тиісті жұмыс жүргізді. Белгілі бір ереже бекітілді. Ал алдағы сайлауға дайындық процесінде бізбе бірге денсаулық сақтау органдары да жұмыс істеп жатыр. Дауыс беру уақытында инфекцияның таралына жол бермеу үшін барлық қажетті шара қабылданады», - деді ол.

Бұған дейін ҚР Орталық сайлау комиссиясының төрағасы Берік Имашев Мәжіліс пен мәслихат депутаттарын сайлау онлайн режимде неліктен өткізілмейтінін түсіндірген болатын. Айта кетейік, 21 қазанда ҚР Президенті Қасым-Жомарт Тоқаев Парламенті Мәжілісі депутаттарының кезекті сайлауын тағайындау туралы Жарлыққа қол қойды.

Айдары: Найзағай 22.10.2020 17

Қатысты мазмұн