1 тамызда Қазақстанда 7573 адамның коронавирус тесті оң шықты. Денсаулық сақтау министрлігі дүйсенбі күні таңертең осылай деп хабарлады.

31 шілдеде 87 адамға коронавирус пневмониясы диагнозы қойылған. 102 адам қайтыс болған: 86 адам – коронавирустан, 16 адам коронавирус пневмониясынан көз жұмды деп айтылады.

Елде вирустың беті әлі қайтпады. Жексенбі күні Нұр-Сұлтанда – 1489, Алматыда – 1540, Қарағанды облысында – 901, Шымкентте 650 науқас тіркелген. Атырау облысында 408 адамнан коронавирус анықталған. Қалған облыстарда 85-300 аралығында науқас тіркелген. Қазір барлық облыс пен қала "қызыл аймақта" тұр.

Қазір 101 мың адам коронавирустан емделіп жатыр. 28 мыңы стационарда ем қабылдап жатыр. 2 мыңнан астам адамның жағдайы ауыр. 196 адам жасанды тыныс аппаратына қосылған.

Билік індеттің өршуін дельта варианттың тарауымен байланыстырады. "Дельта" коронавирустың кәдімгі түріне қарағанда жылдам жұғады және асқынуы да тез. Ресми мәлімет бойынша, Қазақстанда дельта маусым айында тіркелген.

2020 жылдың наурыз айынан бері 587 мың адамның коронавирус тесті оң шыққан. Одан бөлек, 61 мыңнан астам адам коронавирус пневмониясына шалдыққан.

Былтыр наурыз айынан бері 6043 адам коронавирустан қайтыс болды деп айтылады. Тамыз айынан бері коронавирус пневмониясы 3740 адамның өліміне себеп болған. Бұған қоса, коронавирус жұқса да, "басқа аурудан қайтыс болды" деп танылған кемінде 2 мыңнан астам адам өлімі коронавирус статистикасына енгізілмеген.