14 сәуірде Түркістан-Самарқан бағытындағы халықаралық автобустың алғашқы жолаушылары Самарқанға жетті.

Түркістан облысы әкімінің баспасөз қызметінің мәліметінше, автобус күн сайын кешкі сағат 18:00-де жүреді. Жолаушыларды Түркістан қаласындағы «Алтын Орда» автовокзалынан Самарқандағы «Самарқан» автовокзалына алып барады. Жолда Шымкент қаласына, Өзбекстанның Гүлістан және Жыззақ қалаларына аялдайды. Жол ақысы – төрт мың теңге. Билік өкілдерінің айтуынша, Түркістан-Самарқан бағытындағы автобус елге келетін туристер санын арттыруға көмектесуі тиіс.

2018 жылы 10 желтоқсанда Түркістан-Ташкент бағытындағы автобус жүре бастаған. Бұған дейін билік өкілдері екі ел арасында қатынайтын автобустар шекарадан кедергісіз өтеді деп мәлімдеген. Қарашаның 15-і күні Шымкентте алғаш рет екі ел арасындағы қарым-қатынасты дамытуға бағытталған өңіраралық ынтымақтастық форумы өткен.